Mō ngā raraunga

Tatauranga 2023 raraunga whānau, whānau whānui, kāinga hoki e pā ana ki ngā tūhononga ā-iwi me te whakapapa Māori .

Te Kohikohi Raraunga

Kua hoahoatia te Tatauranga 2023 mā te whakamahi i tētahi tauira whakahanumi. Ko te tikanga o tēnei, ka whakahanumihia ngā raraunga kua kohia mā ngā urupare tatauranga (ngā puka tatauranga takitahi, tatauranga whare i oti te whakakī) ki ngā raraunga mai i ngā puna raraunga kē i te wā karekau he urupare puka tatauranga. 

Ko ētahi o ngā puna raraunga kē ko ngā raraunga whakahaere me ngā raraunga nō ngā tatauranga o mua. Ko ngā raraunga whakahaere ka kohia e ngā tari kāwanatanga, e ētahi atu rōpū rānei, hei tauira, ko ngā mauhanga whānautanga, matenga, tāke hoki.

He kōrero anō mō te tauira whakahanumi kei te paetukutuku Tatauranga Aotearoa.

He aha ngā raraunga whānau, whānau whānui, kāinga hoki e pā ana ki ngā tūhononga ā-iwi me te whakapapa Māori? 

Me tūpato i te wā ka whakamāorihia ēnei raraunga, i te wā hoki e whakatairite ana ki ētahi atu raraunga whānau, raraunga kāinga mai i Te Whata, mai i puna kē hoki.

Ko ngā raraunga tūhononga ā-iwi ki te taha whānau, ki te taha kāinga hoki e kōrero ana mō ngā tāngata kei ngā whānau me ngā kāinga.

Mō ngā raraunga tūhononga ā-iwi ki te taha whānau, ko ngā tāngata Māori he noho ā-whānau, he noho kāinga, he noho whare tūmataiti.

Mō ngā raraunga tūhononga ā-iwi ki te taha kāinga, ko ngā tāngata Māori he noho kāinga, he noho whare tūmataiti.

Ko ngā raraunga whānau whakapapa Māori, kāinga whakapapa Māori mō:

ngā tāngata whakapapa Māori kei ngā whānau, kei ngā kāinga hoki, tērā rānei;

ngā whānau whakapapa Māori, tērā rānei;

ngā kāinga whakapapa Māori.

Ko te whakamāramatanga o te whānau whakapapa Māori, te kāinga Māori rānei koia kua rekoatahia tētahi mema ā-whānau, tētahi kāinga rānei he whānau, he kāinga whakapapa Māori rānei.

Te whai māramatanga ki ngā raraunga mā tō iwi

E āhei ana te titiro ki ngā māramatanga whānau, whānau whānui, kāinga hoki e pā ana ki ngā tūhononga ā-iwi me te whakapapa Māori mā ngā mema o tō iwi ki Te Whata mai i te Tāite te 31 o Oketopa 2024.

Ka āhei ngā Kaiwhakahaere Mōhiohio ā-Iwi me ngā mema ā-iwi kei a rātou te mana pānui-anake ki te whārangi tūmataiti o tō rātou iwi, ka āhei rātou te tikiake i ngā tūtohi raraunga ā-iwi taketake utukore i Te Whata ā te 31 o Oketopa 2024.

Ki tō whārangi ā-iwi, ka āhei te tiro atu ki ngā māramatanga mō te āhua o te noho o ngā tāngata o tō iwi, tae atu ki te rahi o te kāinga, te pai o te whare, te whiwhinga moni me te āhua o te hanganga o te whānau. Kia mōhio mai, ko tā ngā māramatanga nei he whakaatu i ngā tāngata takitahi mai i tō iwi e noho ana ki tētahi kāinga, he mema hoki o tētahi whānau, tētahi whānau whānui rānei. Kāore ēnei māramatanga e whakaatu i te kāinga katoa, te whānau katoa, whānau whānui katoa rānei.

Kei te āhua o te rahi o tō iwi, ka kitea pea ētahi kaupapa, taurangi hoki te taha ki ngā whānau, ngā whānau whānui me ngā kāinga e pā ana ki ngā tūhononga ā-iwi me te whakapapa Māori. Tae atu pea ki ētahi māramatanga mō ngā mema ā-iwi i ngā whānau me ngā kāinga, pērā i te whiwhinga moni, te hunga noho kāinga me te noho kōpiripiri.

Ko te rahi o ngā urupare Tatauranga 2023 ka kohia i ngā tāngata o tō iwi, koia hoki te rahi o ngā raraunga hei tātari. Ka whakamahia ērā hei tautohu i ngā tauira me ngā whanaungatanga ka kitea i ngā raraunga. Ka whakairihia ēnei ki Te Whata hei māramatanga mā tō iwi.

Mehemea he Kaiwhakahaere Mōhiohio ā-Iwi koe, ā, kāore anō koe kia tūhono ki Te Whata, tēnā tuku īmēra atu ki tewhata@kahuiraraunga.io. Pānuihia he kōrero anō mō ngā Raraunga ā-Iwi me ngā Kaiwhakahaere Mōhiohio ā-Iwi ki Te Whata.